माकडांच्या धुमाकुळाने महागांवकर त्रस्त, वनविभागाने तातडीने कारवाई करावी

प्रतिनिधी महागांव विवेक नरवाडे 

महागांव : शहरात गेल्या काही दिवसांपासून माकडांच्या वाढत्या संख्येमुळे नागरिकांचे जगणे अक्षरशः हैराण झाले आहे. शहरातील विविध भागात माकडांचा वावर वाढला असून घरांच्या छतांवर, झाडांवर आणि रस्त्यांवर माकडांचे टोळके फिरत असल्याने नागरिकांमध्ये भीतीचे वातावरण निर्माण झाले आहे. लहान मुले, महिला आणि ज्येष्ठ नागरिकांना घराबाहेर पडताना सावधगिरी बाळगावी लागत असल्याचे चित्र सध्या शहरात पाहायला मिळत आहे.

महागांव शहरातील मुख्य बाजारपेठ, निवासी वसाहती तसेच शाळा परिसरात माकडांचे टोळके मोठ्या प्रमाणात फिरताना दिसत आहेत. घरांच्या छतांवर उड्या मारणे, घरातील अन्नपदार्थ पळवणे, अंगणातील वस्तू फेकून देणे अशा प्रकारांमुळे नागरिक त्रस्त झाले आहेत. अनेक वेळा माकडांनी घरात घुसून अन्नधान्याची नासधूस केल्याच्या घटनाही घडल्या आहेत.

काही ठिकाणी माकडांनी झाडांवरील फळे तोडून टाकणे, भाजीपाला व पिकांचे नुकसान करणे असे प्रकारही समोर येत आहेत. त्यामुळे शेतकरी आणि घरगुती बागायती करणारे नागरिकही चिंतेत आहेत. विशेषतः सकाळी आणि सायंकाळी माकडांचा उपद्रव अधिक वाढत असल्याचे नागरिक सांगत आहेत.

शहरातील काही भागात माकडांनी नागरिकांवर झडप घालण्याचा प्रयत्न केल्याच्या घटनाही घडल्याची माहिती समोर येत आहे. त्यामुळे लहान मुलांना शाळेत पाठवताना पालकांमध्ये भीतीचे वातावरण निर्माण झाले आहे. काही नागरिकांनी माकडांपासून वाचण्यासाठी घरांच्या खिडक्या आणि दरवाजे सतत बंद ठेवण्याची वेळ आल्याचे सांगितले.

नागरिकांच्या मते, शहरात माकडांची संख्या दिवसेंदिवस वाढत असून त्यावर नियंत्रण ठेवण्यासाठी संबंधित यंत्रणांनी तातडीने उपाययोजना करणे आवश्यक आहे. माकडांच्या उच्छादामुळे शहरातील नागरिकांचे दैनंदिन जीवन विस्कळीत होत असल्याने या समस्येकडे गांभीर्याने लक्ष देण्याची गरज असल्याचे मत व्यक्त केले जात आहे.

दरम्यान, वनविभागाने महागांव शहरातील माकडांच्या वाढत्या उपद्रवाची दखल घेऊन तातडीने पथक पाठवावे आणि माकडांना पकडून सुरक्षित ठिकाणी स्थलांतरित करावे, अशी मागणी नागरिकांकडून होत आहे. शहरातील वाढत्या माकडांच्या उच्छादावर वेळीच नियंत्रण मिळवले नाही तर भविष्यात मोठी दुर्घटना घडण्याची शक्यता नाकारता येत नाही, अशी भीतीही काही नागरिकांनी व्यक्त केली आहे.

सध्या तरी महागाव शहरात माकडांचा उपद्रव हा नागरिकांसाठी डोकेदुखी ठरत असून प्रशासनाने तातडीने यावर तोडगा काढावा, अशी मागणी जोर धरू लागली आहे