महागांव परिसरात पीकविमा योजनेकडे शेतकऱ्यांची पाठ; गतवर्षीच्या अनुभवामुळे शेतकऱ्यांमध्ये नाराजी

दवंडी वार्तापत्र महागांव प्रतिनिधी विवेक  नरवाडे 

गतवर्षी झालेल्या अतिवृष्टीमुळे पिकांचे मोठे नुकसान झाले होते, मात्र पीकविमा कंपन्यांनी शेतकऱ्यांना विम्याचा लाभ न दिल्याने महागांव परिसरातील शेतकरी संतप्त आहेत. या कडवट अनुभवामुळे यंदा अनेक शेतकऱ्यांनी पीकविमा योजनेकडे पाठ फिरवल्याचे चित्र समोर आले आहे.

काय आहे नेमकी परिस्थिती?

नुकसान भरपाईचा अभाव: गेल्या वर्षी खरीप हंगामात सोयाबीनसह इतर पिकांचे अतोनात नुकसान झाले होते. शेतकऱ्यांनी विमा उतरवूनही त्यांना लाभापासून वंचित ठेवण्यात आले.

शेतकऱ्यांची प्रतिक्रिया: "गतवर्षी मोठे नुकसान होऊनही विम्याचा लाभ मिळाला नाही, त्यामुळे यावर्षी मी पीक विमा भरलेलाच नाही," अशी प्रतिक्रिया शेतकरी बाळू पाटील नरवाडे यांनी व्यक्त केली आहे.

पाठपुरावा करूनही अपयश: स्थानिक शेतकरी नेते मनीष जाधव यांच्यासह अनेक शेतकरी संघटनांनी सातत्याने पाठपुरावा केला, आंदोलने केली आणि प्रशासनाला निवेदने दिली. तरीही विमा कंपनी किंवा शासन यापैकी कोणीही ठोस दखल घेतली नाही.

चिंतेची बाब:

चालू खरीप हंगामासाठी पीक विमा भरण्याची अंतिम मुदत ३१ जुलै आहे. मुदत जवळ आली असतानाही महागाव परिसरात शेतकऱ्यांकडून योजनेला मिळणारा प्रतिसाद अत्यंत अल्प आहे. गतवर्षीच्या फसवणुकीच्या अनुभवामुळे शेतकरी या योजनेपासून दुरावत आहेत, जी बाब शासन आणि विमा कंपन्यांसाठी चिंतेची ठरत आहे.