महागांव नगरपंचायत नगराध्यक्ष निवडीसाठी काँग्रेसचा कडक व्हीप, राजकीय घडामोडींना वेग

प्रतिनिधी महागांव विवेक नरवाडे दवंडी वृत्तपत्र

 महागांव नगरपंचायतीत २७ फेब्रुवारी २०२६ रोजी होणाऱ्या नगराध्यक्ष निवडीच्या विशेष सभेच्या पार्श्वभूमीवर राजकीय वातावरण तापले आहे. भारतीय राष्ट्रीय काँग्रेस पक्षाने आपल्या सर्व नगरसेवकांना कडक व्हीप जारी करत अधिकृत उमेदवाराच्या बाजूनेच मतदान करण्याचे आदेश दिले आहेत.नगरपंचायत कार्यालयात होणाऱ्या विशेष सर्वसाधारण सभेत नगराध्यक्ष पदासाठी निवड प्रक्रिया पार पडणार आहे. या निवडीकडे संपूर्ण तालुक्याचे लक्ष लागले असून सत्तासमीकरणात मोठे बदल होण्याची शक्यता व्यक्त केली जात आहे.

काँग्रेसच्या वतीने सौ. रूपाली संतोष कोल्हेकर यांना नगराध्यक्ष पदासाठी अधिकृत उमेदवार घोषित करण्यात आले आहे. जिल्हाध्यक्ष प्रफुल मानकर यांच्या आदेशानुसार पक्ष गटनेत्यांकडून नगरसेवकांना लेखी पक्षादेश (व्हीप) बजावण्यात आला आहे.

या व्हीपनुसार सर्व सदस्यांनी २७ फेब्रुवारी रोजी सभेला अनिवार्य उपस्थित राहून सौ. रूपाली संतोष कोल्हेकर यांच्या बाजूने हात उंच करून मतदान करावे, असे स्पष्ट निर्देश देण्यात आले आहेत. कोणत्याही परिस्थितीत अनुपस्थित राहू नये किंवा पक्षाच्या भूमिकेविरुद्ध मतदान करू नये, असे पत्रात नमूद करण्यात आले आहे.

पक्षशिस्त भंग केल्यास संबंधित सदस्यांविरुद्ध कठोर कारवाईचा इशाराही देण्यात आला आहे. विशेषतः महाराष्ट्र स्थानिक प्राधिकरण सदस्य अनर्हता अधिनियम १९८६ अंतर्गत अपात्रतेची कारवाई होऊ शकते, अशी स्पष्ट सूचना देण्यात आली आहे. त्यामुळे संबंधित नगरसेवकांवर राजकीय दबाव वाढल्याचे चित्र आहे.

महागाव नगरपंचायतीतील सध्याच्या राजकीय समीकरणात प्रत्येक मत महत्त्वाचे मानले जात आहे. त्यामुळे सर्वच पक्षांनी आपापल्या सदस्यांना एकत्र ठेवण्यासाठी हालचाली सुरू केल्या आहेत. नगराध्यक्ष निवडीची ही विशेष सभा केवळ औपचारिक न राहता प्रतिष्ठेची लढत ठरणार असल्याचे राजकीय जाणकारांचे मत आहे.

दरम्यान, काँग्रेसच्या निर्णयामुळे इतर पक्षांमध्येही रणनीती आखण्यास सुरुवात झाली आहे. नगरपंचायतीत बहुमत सिद्ध करण्यासाठी सर्वच गट प्रयत्नशील असल्याने पुढील काही दिवसांत राजकीय घडामोडींना अधिक वेग येण्याची शक्यता आहे.

सौ. रूपाली संतोष कोल्हेकर यांच्या उमेदवारीमुळे काँग्रेस कार्यकर्त्यांमध्ये उत्साहाचे वातावरण आहे. पक्षाने एकजुटीचा संदेश देत शिस्तीवर भर दिला आहे. व्हीप जारी केल्यामुळे सभेतील मतदान प्रक्रिया अधिक चुरशीची होणार असल्याचे संकेत मिळत आहेत.

नगराध्यक्ष निवडीच्या पार्श्वभूमीवर महागाव नगरपंचायत राजकीय चर्चेचा केंद्रबिंदू ठरली असून २७ फेब्रुवारीची विशेष सभा कोणत्या दिशेने निकाल लावते, याकडे सर्वांचे लक्ष लागले आहे.