आठवडी बाजारात आग, नाल्या तुंबल्या, कचऱ्याचे साम्राज्य; महागावांत आरोग्य व सुरक्षेचा प्रश्न ऐरणीवर

प्रतिनिधी महागांव विवेक नरवाडे  दवंडी वार्तापत्र 

महागांव :महागांवच्या आठवडी बाजाराचा गजबजाट हा गावाच्या अर्थचक्राला गती देणारा असला, तरी त्याच बाजारातून आता अस्वच्छता, दुर्लक्ष आणि सुरक्षेच्या त्रुटींचे भयावह चित्र समोर येऊ लागले आहे. गुरुवारी अज्ञात व्यक्तीकडून लावण्यात आलेल्या आगीने या सर्व प्रश्नांना जणू ठिणगीच दिली असून आज भडकलेल्या ज्वाळांनी केवळ बाजारच नव्हे, तर व्यवस्थेतील उणिवाही उघड केल्या.

जिल्हा परिषद शाळा व पाणी फिल्टरजवळ घडलेली ही घटना गावकऱ्यांच्या मनात भीतीचे सावट निर्माण करून गेली. बाजाराच्या दिवशी गजबजलेल्या या परिसरात अशा प्रकारची आग लागणे हे केवळ योगायोग नसून सुरक्षेच्या उपाययोजनांचा अभाव असल्याचे स्पष्ट संकेत देणारे आहे. विशेष म्हणजे, आगीवर नियंत्रण मिळवण्यासाठी घटनास्थळी कोणतीही अग्निशमन साधने उपलब्ध नसणे ही बाब अधिकच चिंताजनक ठरली. नागरिकांनी स्वतःच्या जीवाची पर्वा न करता पुढाकार घेत आग आटोक्यात आणली, ही बाब दिलासादायक असली तरी प्रशासनाच्या तयारीवर प्रश्नचिन्ह उभे करणारी आहे.

महागावचा आठवडी बाजार हा केवळ खरेदी-विक्रीचा केंद्रबिंदू नाही, तर तो ग्रामीण अर्थव्यवस्थेचा आधारस्तंभ आहे. शेतकरी, लहान व्यापारी आणि सर्वसामान्य नागरिक यांच्या जीवनाशी निगडित असलेल्या या बाजाराची अवस्था मात्र दिवसेंदिवस बिकट होत चालल्याचे चित्र आहे. दर शुक्रवारी बाजार भरल्यानंतर दुसऱ्याच दिवशी परिसरात कचऱ्याचे साम्राज्य पसरत असल्याचे वास्तव कुणापासूनही लपलेले नाही.

त्यात भर म्हणजे बाजार परिसरातील नाल्या अक्षरशः तुंबलेल्या अवस्थेत आहेत. साचलेले पाणी, दुर्गंधी आणि वाढती अस्वच्छता यामुळे डासांची उत्पत्ती वाढत असून संसर्गजन्य आजारांचा धोका निर्माण झाला आहे. शेजारील जिल्हा परिषद शाळेतील लहान मुलांच्या आरोग्यावर याचा थेट परिणाम होण्याची भीती व्यक्त होत आहे. शिक्षणाच्या मंदिराजवळच अस्वच्छतेचे डोंगर उभे राहणे ही परिस्थिती निश्चितच चिंतेची बाब आहे.

या सर्व पार्श्वभूमीवर, सुदैवाने आगीच्या घटनेत कोणतीही जीवितहानी झाली नाही आणि मोठा अनर्थ टळला, हे खरे; पण या घटनेने महागावच्या आठवडी बाजारातील सुरक्षेचे, स्वच्छतेचे आणि नियोजनाच्या अभावाचे वास्तव अधोरेखित केले आहे.

आता गरज आहे ती केवळ तात्पुरत्या उपायांची नाही, तर ठोस आणि दीर्घकालीन नियोजनाची. बाजार परिसरात अग्निसुरक्षा साधने उपलब्ध करून देणे, नियमित नालेसफाई करणे, कचरा व्यवस्थापनासाठी प्रभावी यंत्रणा उभी करणे आणि शाळेजवळील परिसर स्वच्छ ठेवणे या बाबी तातडीने राबविणे अत्यावश्यक झाले आहे.

अन्यथा, आजची ही घटना केवळ इशारा ठरेल आणि उद्याचा दिवस अधिक मोठ्या संकटाची चाहूल देऊन जाईल, अशी भीती व्यक्त होत आहे.