दारू दुकानाने प्रभाग १चा चेहरामोहरा बदलला

 सुरक्षेपासून मालमत्ता बाजारापर्यंत सर्वच बट्ट्याबोळ शाळकरी मुली, महिला असुरक्षित; घरांना खरेदीदार नाहीत, भाव कोसळले – १६ एप्रिलचे मतदान ठरणार निर्णायक

दवंडी वार्तापत्र महागांव प्रतिनिधी  विवेक नरवाडे 

महागांव :प्रभाग क्रमांक १ मधील देशी दारू दुकानामुळे परिसरातील सामाजिक आणि आर्थिक स्थितीवर गंभीर परिणाम होत असल्याचे चित्र समोर येत आहे. दारू दुकानाभोवती दिवसभर वाढलेली गर्दी, अर्वाच्य भाषा, किरकोळ भांडणे आणि रस्त्यावरच होणारी अस्वच्छता यामुळे नागरिकांचे दैनंदिन जीवन विस्कळीत झाले आहे. विशेषतः महिलांना आणि शाळकरी मुलींना बाहेर पडताना असुरक्षिततेची भावना निर्माण झाली असून पालकांमध्येही चिंता वाढली आहे.

स्थानिकांचे मत, संध्याकाळनंतर परिसरात राहणेही अवघड होते. काही ठिकाणी मद्यधुंद व्यक्तींमुळे त्रासदायक वातावरण निर्माण होत असून, याचा थेट परिणाम सामाजिक शिस्तीवर होत आहे. महिलांनी अनेक वेळा याबाबत आवाज उठवला असला तरी परिस्थितीत फारसा बदल झालेला दिसत नाही.

या बिघडलेल्या वातावरणाचा सर्वाधिक फटका प्रॉपर्टी बाजाराला बसत आहे. प्रभागातील अनेक घरमालकांनी घरे विक्रीसाठी ठेवली असली तरी खरेदीदार पुढे येत नाहीत. “त्या भागात घर नको” अशी प्रतिक्रिया देत लोक या परिसरापासून दूर राहणे पसंत करत आहेत. परिणामी घरांचे भाव घसरले असून काही घरे रिकामी पडण्याची शक्यता व्यक्त होत आहे. त्यामुळे घरमालकांवर आर्थिक संकट ओढवले आहे.

दरम्यान, या प्रश्नावर तोडगा काढण्यासाठी १६ एप्रिल रोजी महत्त्वाची मतदान प्रक्रिया पार पडणार आहे. शासनाच्या नियमानुसार महिला मतदारांच्या कौलावर दारू दुकानाचे भवितव्य ठरणार आहे. त्यामुळे प्रभागात उत्सुकता वाढली असून महिलांमध्ये मतदानाबाबत जागरूकता दिसून येत आहे.

मात्र, या पार्श्वभूमीवर काहींकडून मतदारांना विविध आमिषे दाखवून मतदानावर प्रभाव टाकण्याचे प्रयत्न सुरू असल्याची चर्चा आहे. पैशांचे आमिष, देवदर्शन किंवा इतर प्रलोभनांद्वारे मत वळवण्याचा प्रयत्न होत असल्याचा आरोप स्थानिकांकडून करण्यात येत आहे. त्यामुळे नागरिकांनी अशा आमिषांना बळी न पडता स्वतःच्या आणि कुटुंबाच्या हिताचा विचार करून मतदान करावे, असे आवाहन जनआंदोलनातून करण्यात येत आहे.

एकूणच, दारू दुकानामुळे प्रभाग १ मधील सामाजिक वातावरण ढासळले असून त्याचा परिणाम सुरक्षेपासून आर्थिक स्थैर्यापर्यंत होत आहे. आता १६ एप्रिलच्या मतदानातून नागरिक काय निर्णय देतात, यावरच या परिसराचे भवितव्य अवलंबून राहणार आहे.