अहिल्यानगर येथे श्री विश्वकर्मा पांचाळ सुतार समाज ट्रस्टची अध्यक्षपदी हरीभाऊ भालेराव यांची एकमताने निवड

अहिल्यानगर,: — श्री विश्वकर्मा पांचाळ सुतार समाज ट्रस्ट, अहिल्यानगर यांची वार्षिक सभा उत्साहपूर्ण व एकोप्याच्या वातावरणात पार पडली. या सभेला समाजातील ज्येष्ठ मान्यवर, पदाधिकारी तसेच युवकांची मोठ्या संख्येने उपस्थिती लाभली.

सभेच्या प्रारंभी ट्रस्टच्या विविध उपक्रमांचा आढावा घेण्यात आला. शिक्षण, सामाजिक बांधिलकी, युवकांचे मार्गदर्शन आणि समाजातील एकजूट वाढवण्यासाठी राबविण्यात येणाऱ्या योजनांवर सखोल चर्चा झाली. त्यानंतर ट्रस्टच्या नवीन कार्यकारिणीच्या निवडीसंदर्भात विचारविनिमय करण्यात आला.

या सभेतील प्रमुख आकर्षण ठरलेली अध्यक्षपदाची निवड प्रक्रिया एकमताने पार पडली. समाजाचे ज्येष्ठ मार्गदर्शक व अनुभवी सामाजिक कार्यकर्ते श्री. हरीभाऊ बापूराव भालेराव यांची अध्यक्षपदी सर्वानुमते निवड करण्यात आली. त्यांच्या दीर्घकालीन सामाजिक कार्याचा व समाजासाठी दिलेल्या योगदानाचा गौरव करत उपस्थितांनी टाळ्यांच्या कडकडाटात त्यांचे स्वागत केले.

निवडीनंतर मनोगत व्यक्त करताना श्री. भालेराव यांनी सर्व सदस्यांचे आभार मानले व समाजाच्या सर्वांगीण विकासासाठी कटिबद्ध राहण्याचा निर्धार व्यक्त केला. युवकांना सक्षम बनवणे, परंपरा व आधुनिकतेचा समतोल साधणे आणि समाजाला प्रगतीच्या दिशेने नेणे हा आपला उद्देश असल्याचे त्यांनी सांगितले.

या प्रसंगी उपाध्यक्ष श्री. तुकाराम महामुनी, सचिव श्री. राधाकृष्ण वाकचौरे, तसेच विश्वस्त श्री. प्रभाकर वाघमारे, श्री. सतीश क्षीरसागर, श्री. श्रीराज भागवत, श्री. अनिल मोरे आणि श्री. राजेंद्र क्षीरसागर यांची उपस्थिती होती.

सभेचे नियोजन यशस्वीपणे पार पाडल्याबद्दल पदाधिकारी व कार्यकर्त्यांचे कौतुक करण्यात आले. सभेचा समारोप एकोप्याचा संदेश देत व समाजाच्या उज्ज्वल भविष्यासाठी संकल्प व्यक्त करून करण्यात आला.