गुंज शिवारातील शेतकऱ्यावर दुहेरी संकट

गोठ्याला आग लागून शेतीसाहित्य आणि वैरण खाक उन्हाळ्याच्या तडाख्यात शेतकऱ्याचे मोठे आर्थिक नुकसान पाण्याअभावी आग विझवताना ग्रामस्थांची धावपळ तातडीच्या मदतीची शेतकरी वर्गातून मागणी

प्रतिनिधी महागांव विवेक नरवाडे दवंडी वार्तापत्र 

महागांव :आधीच नापिकी, वाढता उत्पादन खर्च आणि आर्थिक संकटाच्या छायेत जगणाऱ्या शेतकऱ्यांवर आता नैसर्गिक आणि आकस्मिक संकटांचे सावट अधिक गडद होताना दिसत आहे. महागांव तालुक्यातील गुंज शिवारात शेतातील गोठ्याला अचानक आग लागून मोठे नुकसान झाल्याची घटना घडली असून या आगीत शेतीसाठी लागणारे साहित्य, अवजारे आणि जनावरांसाठी साठवून ठेवलेली वैरण जळून खाक झाली. या घटनेमुळे संबंधित शेतकरी कुटुंबावर मोठे आर्थिक संकट कोसळले आहे.

मिळालेल्या माहितीनुसार, गुंज येथील शेतकरी आकाश भगवान यादव यांच्या शेत सर्वे क्रमांक २८५ मधील गोठ्याला दुपारच्या सुमारास अचानक आग लागली. उन्हाच्या तीव्र झळा आणि कोरडे वातावरण यामुळे काही क्षणांतच आगीने भीषण रूप धारण केले. शेतात पोहोचल्यानंतर गोठ्यातून मोठ्या प्रमाणात धूर आणि ज्वाळा उठताना दिसताच आकाश यादव यांनी आरडाओरड करत ग्रामस्थांना मदतीसाठी बोलावले.

घटनेची माहिती मिळताच परिसरातील नागरिकांनी तातडीने घटनास्थळी धाव घेत आग विझविण्याचा प्रयत्न सुरू केला. मात्र परिसरात पाण्याची पुरेशी व्यवस्था नसल्यामुळे ग्रामस्थांना मोठ्या अडचणींचा सामना करावा लागला. काहींनी मोटारपंपाच्या सहाय्याने तर काहींनी बादल्या आणि ड्रमच्या मदतीने आग आटोक्यात आणण्याचा प्रयत्न केला. अखेर मोठ्या प्रयत्नांनंतर आग नियंत्रणात आली; मात्र तोपर्यंत मोठे नुकसान झाले होते.

या आगीत गोठ्यात ठेवलेले ट्रॅक्टरचे साहित्य, नांगरटीसाठी लागणारी अवजारे, स्प्रिंकलरचे पाइप, शेती उपयोगी साधने तसेच जनावरांसाठी साठवून ठेवलेली मोठ्या प्रमाणातील वैरण पूर्णपणे जळून खाक झाली. शेतकऱ्याने उन्हाळा आणि आगामी हंगाम लक्षात घेऊन साठवून ठेवलेले साहित्य काही क्षणांत राख झाल्याने यादव कुटुंब हतबल झाले आहे.

ग्रामीण भागातील शेतकरी वर्षभर कष्ट करून शेतीसाठी लागणारे साहित्य आणि जनावरांसाठी चारा साठवून ठेवतात. अशा वेळी अचानक लागलेल्या आगीत सर्वस्व जळून गेल्याने संबंधित शेतकऱ्यांसमोर नव्याने उभे राहण्याचे मोठे आव्हान निर्माण झाले आहे. आधीच शेतीमालाला अपेक्षित भाव नसल्याने आर्थिक अडचणीत सापडलेल्या शेतकऱ्यांसाठी अशा घटना अधिक वेदनादायी ठरत आहेत.

स्थानिक शेतकऱ्यांनी प्रशासनाने तातडीने पंचनामा करून नुकसानग्रस्त शेतकऱ्याला आर्थिक मदत द्यावी, अशी मागणी केली आहे. शेतकऱ्याचे नुकसान केवळ पैशांमध्ये मोजता येत नाही. त्यामागे त्याची वर्षभराची मेहनत आणि भविष्याची तयारी असते, अशी भावना ग्रामस्थांनी व्यक्त केली.

दरम्यान, उन्हाळ्यात वाढते तापमान, कोरडे गवत आणि विजेच्या तारा किंवा इतर कारणांमुळे ग्रामीण भागात आगीच्या घटना वाढताना दिसत आहेत. त्यामुळे शेतकऱ्यांनी अधिक सतर्क राहण्याची गरज व्यक्त केली जात आहे. तसेच अशा घटनांमध्ये तातडीने मदत पोहोचण्यासाठी ग्रामपातळीवर आपत्कालीन यंत्रणा अधिक सक्षम करण्याची मागणीही पुढे येत आहे.

गुंज शिवारातील या घटनेने परिसरातील शेतकरी हळहळ व्यक्त करत आहेत. एकीकडे पाणीटंचाई, दुसरीकडे वाढता खर्च आणि आता अशा आगीच्या घटना… शेतकरी जगायचे तरी कसे? असा प्रश्न अनेक शेतकऱ्यांनी उपस्थित केला आहे.

या घटनेचा पंचनामा करून आपत्ती व्यवस्थापन विभाग तसेच कृषी विभागामार्फत नुकसानग्रस्त शेतकऱ्याला तातडीने मदत मिळावी, अशी अपेक्षा व्यक्त होत आहे. ग्रामीण भागातील शेतकरी संकटाशी दोन हात करत असताना शासनाने संवेदनशीलता दाखवून वेळेवर मदतीचा हात पुढे करणे आवश्यक असल्याचे मत नागरिकांतून व्यक्त होत आहे.