प्रतिनिधी महागांव विवेक नरवाडे दवंडी वार्तापत्र
महामार्गांवर नवदेवांच्या गाड्या लक्ष्य; पोलीस प्रशासनाची भूमिका संशयाच्या भोवऱ्यात लग्नसराईचा हंगाम सुरू होताच शहर आणि ग्रामीण भागात आनंदाचे वातावरण निर्माण झाले आहे. बँडच्या तालावर थिरकणाऱ्या वराती, सजवलेल्या गाड्या, नव्या नात्यांचे सोहळे आणि मंगलध्वनींनी रस्ते गजबजू लागले आहेत. मात्र या आनंदाच्या वातावरणावर आता एका नव्या प्रकाराने काळी छाया टाकली आहे. बाहेरगावाहून शहरात येणाऱ्या नवदेवांच्या वराती अडवून काही बोगस तृतीयपंथीयांकडून जबरदस्तीने पैसे उकळले जात असल्याच्या तक्रारी वाढू लागल्या आहेत. रस्त्याच्या मधोमध वाहन अडवणे, मोठमोठ्याने आरडाओरड करणे, पैसे न दिल्यास हुज्जत घालणे आणि मानसिक दबाव टाकणे या प्रकारांनी नागरिक त्रस्त झाले आहेत.
विशेष म्हणजे हा प्रकार आता अपवाद राहिलेला नाही, तर तो एक प्रकारचा “रस्त्यावरील संघटित त्रास” बनू लागल्याची भावना वाहनधारकांत व्यक्त होत आहे. पुसद रोड, ढाणकी रोड, नांदेड रोडवरील पैनगंगा नदी परिसर, बिजोरा टोल नाका तसेच शहराबाहेरील वाहतूक मंदावणारी ठिकाणे ही अशा प्रकारांसाठी “हॉटस्पॉट” बनल्याचे नागरिक सांगत आहेत.
वरातींच्या गाड्या दूरवरून ओळखून त्यांच्यासमोर अचानक उभे राहणे, रस्त्याच्या मधोमध टाळ्या वाजवत वाहन थांबविणे आणि “शगुन”च्या नावाखाली थेट पैशांची मागणी करणे, हा प्रकार आता उघडपणे सुरू आहे. काही वेळा वाहनचालकांनी पैसे देण्यास नकार दिल्यास वाहन पुढे जाऊ न देणे, प्रवाशांशी वाद घालणे किंवा अपमानास्पद भाषा वापरण्याचे प्रकारही घडत असल्याच्या तक्रारी समोर येत आहेत.
लग्नासाठी निघालेल्या वरातींमध्ये महिला, लहान मुले आणि ज्येष्ठ नागरिक असतात. अशावेळी अचानक रस्त्यात वाहन अडवून आरडाओरड केल्याने अनेकांच्या मनात भीती निर्माण होते. “लग्नाचा आनंद घेऊन निघालो आणि मध्येच रस्त्यावर अडवून पैसे मागितले जातात. न दिल्यास गाडीसमोर उभे राहतात. वाद वाढेल म्हणून पैसे देऊन पुढे जावे लागते,” अशी भावना अनेक वाहनधारकांनी व्यक्त केली.
काही नागरिकांनी नाव न छापण्याच्या अटीवर सांगितले की, “हे खरे तृतीयपंथी आहेत की बोगस, हेच समजत नाही. काही जण मुद्दाम महिलांच्या आणि कुटुंबातील सदस्यांच्या उपस्थितीत गोंधळ घालतात. त्यामुळे अनेकजण मानहानी टाळण्यासाठी पैसे देतात.” या प्रकारामुळे लग्नसमारंभासाठी बाहेर पडलेल्या कुटुंबांमध्ये अस्वस्थता वाढत आहे.
विशेषतः सकाळी नवदेवाच्या वराती शहरात प्रवेश करताना आणि रात्री उशिरा गावाकडे परत जाताना असे प्रकार अधिक घडत असल्याचे सांगितले जात आहे. काही ठिकाणी तर रस्त्यावरील खड्डे, गतीरोधक किंवा टोल नाक्यांजवळ वाहनांचा वेग कमी होताच गाड्या अडवल्या जात असल्याच्या तक्रारी आहेत. म्हणजेच वाहन थांबविण्यासाठी मुद्दाम “कमकुवत ठिकाणे” निवडली जात असल्याचा संशय व्यक्त होत आहे.
या प्रकारामुळे नागरिकांमध्ये एक गंभीर प्रश्न उपस्थित होत आहे — रस्त्यावर उघडपणे वाहन अडवून पैसे उकळले जात असताना पोलीस प्रशासन नेमके काय करत आहे? शहरातील प्रमुख चौक, महामार्ग, टोल नाके आणि लग्नमंडप परिसरात रोज वाहतूक असते. तरीही असे प्रकार सातत्याने घडत असतील तर त्याकडे दुर्लक्ष कोण करत आहे? असा सवाल आता उघडपणे विचारला जात आहे.
नागरिकांचे म्हणणे आहे की, खरे तृतीयपंथी समाजाचा एक घटक आहेत आणि त्यांचा सन्मान राखला गेला पाहिजे. मात्र त्यांच्या नावाचा वापर करून काही बोगस टोळ्या जबरदस्तीने पैसे उकळत असतील, तर त्यांच्यावर कारवाई होणे आवश्यक आहे. अन्यथा समाजात गैरसमज निर्माण होऊन खऱ्या तृतीयपंथी समाजालाही त्याचा फटका बसू शकतो.
कायद्याच्या चौकटीबाहेर जाऊन कोणालाही वाहन अडवण्याचा अधिकार नाही. महामार्गांवर किंवा शहरातील रस्त्यांवर अशा प्रकारे वाहन थांबवून पैसे मागणे हे केवळ गैरसोयीचे नाही, तर गंभीर सुरक्षेचे संकटही आहे. अचानक वाहन अडवल्यामुळे अपघात होण्याची शक्यता नाकारता येत नाही. विशेषतः रात्रीच्या वेळी अशा घटना अधिक धोकादायक ठरू शकतात.
व्यापारी, वाहनधारक आणि सामाजिक संघटनांनी आता पोलीस प्रशासनाने विशेष मोहीम राबविण्याची मागणी केली आहे. शहराबाहेरील टोल नाके, प्रमुख चौक आणि लग्नमंडप परिसरात विशेष गस्त वाढवावी, संशयास्पद हालचालींवर लक्ष ठेवावे आणि जबरदस्तीने पैसे उकळणाऱ्यांवर कठोर कारवाई करावी, अशी मागणी होत आहे.
“शहरात येणाऱ्या प्रत्येक वरातीला रस्त्यात अडवले जाईल आणि प्रशासन फक्त पाहत बसेल, तर सामान्य माणसाने सुरक्षिततेची अपेक्षा कुणाकडून करायची?” असा संतप्त सवाल नागरिक विचारत आहेत.
सामाजिक जाणकारांच्या मते, या प्रश्नाकडे केवळ “रस्त्यावर पैसे मागण्याचा प्रकार” म्हणून पाहता कामा नये. हा कायदा आणि सुव्यवस्थेचा प्रश्न आहे. कारण आज लग्नाच्या गाड्या अडवल्या जात आहेत; उद्या सामान्य नागरिकांनाही अशाच प्रकारे लक्ष्य केले जाऊ शकते.
दरम्यान, काही ठिकाणी वाहनधारक आणि पैसे मागणाऱ्यांमध्ये वाद झाल्याच्या घटनाही समोर आल्या आहेत. त्यामुळे भविष्यात कायदा-सुव्यवस्थेचा प्रश्न निर्माण होण्याची शक्यता व्यक्त केली जात आहे. वेळेत उपाययोजना न झाल्यास नागरिकांचा रोष वाढण्याची चिन्हे आहेत.
लग्नसराईचा हंगाम हा आनंदाचा आणि उत्साहाचा असतो. मात्र या मंगल वातावरणात जर रस्त्यावर भीतीचे सावट निर्माण होत असेल, तर ती प्रशासनासाठी गंभीर इशारा मानला पाहिजे. आता तरी पोलीस प्रशासनाने झोपेतून जागे होऊन शहराबाहेरील थांबे, महामार्ग, टोल नाके आणि प्रमुख चौकांवर कठोर नजर ठेवत अशा प्रकारांना आळा घालावा, अशी तीव्र मागणी नागरिकांतून होत आहे.
Post a Comment
0 Comments