नांदूरमध्यमेश्वर येथील विद्यार्थिनी बिबट्याच्या हल्ल्यात जखमी पुन्हा एकदा बिबट्याच्या भीतीने परिसरात घबराट

 

प्रतिनिधी गणेश ठाकरे लासलगाव 

येवला येथील महाविद्यालयात परीक्षा देऊन वडिलांसोबत दुचाकीने घरी परतत असताना नांदगावजवळ बिबट्याने केलेल्या हल्ल्यात नांदूरमध्यमेश्वर येथील विद्यार्थिनी जखमी झाल्याची घटना शुक्रवारी रात्री घडली. याबाबत सविस्तर वृत्त असे की, नांदूरमध्यमेश्वर येथील सिद्धी गोपाळा शिंदे (वय २०) ही येवला येथील एस. एन. डी. टी. कॉलेजमध्ये एफ. वाय. बी. ए. वर्गात शिक्षण घेत आहे.

 शुक्रवारी परीक्षा असल्याने ती वडिलांसोबत दुचाकीने येवला येथे गेली होती. परीक्षा संपल्यानंतर रात्री साडेसातच्या सुमारास दोघे नांदूरमध्यमेश्वरकडे परत येत असताना धारणगाव नांदगाव दरम्यान नामदेव नवले यांच्या वस्तीजवळ अचानक बिबट्याने दुचाकीवर हल्ला केला. या हल्ल्यात बिबट्याने सिद्धी शिंदे हिच्या डाव्या पायाला चावा घेतल्याने ती गंभीर जखमी झाली. जखमी अवस्थेत तिला तत्काळ निफाड उपजिल्हा रुग्णालयात दाखल करण्यात आले. तेथे वैद्यकीय अधिकारी प्रल्हाद चव्हाण यांनी उपचार करून तिची प्रकृती स्थिर असल्याने उपचारानंतर तिला घरी सोडण्यात आले.

दरम्यान, या परिसरात बिबट्याचा वावर वाढल्याने नागरिकांमध्ये भीतीचे वातावरण निर्माण झाले असून बिबट्याला जेरबंद करण्यासाठी पिंजरा लावण्याची मागणी होत आहे. घटनेची माहिती मिळताच निफाड वनपरिक्षेत्र अधिकारी विजय दोंदे यांनी घटनास्थळी भेट देऊन पाहणी केली असून बिबट्याला पकडण्यासाठी त्या ठिकाणी पिंजरा लावण्यात आला आहे.

घटना घडलेला परिसर सुनसान असून रात्रीची वेळ असल्याने जखमी विद्यार्थिनीच्या मदतीसाठी अक्षय निकम यांनी तत्काळ धाव घेतली. गोपाळ शिंदे यांनी फोनद्वारे माहिती दिल्यानंतर निकम हे स्वतःच्या वाहनाने घटनास्थळी दाखल झाले व जखमी विद्यार्थिनीला रुग्णालयात दाखल केले. तसेच घटनेची माहिती वनविभागाला व परिसरातील नागरिकांनाही दिली. त्यांच्या या तत्परतेचे सर्वत्र कौतुक होत आहे.