महागांवात बिबट्याची दहशत, नागरिकांमध्ये भीतीचे सावट तात्काळ जेरबंद करा!वनविभावर कारवाईचा दबाव

प्रतिनिधी महागांव विवेक नरवाडे दवंडी वार्तापत्र 

महागांव शहर व परिसरात बिबट्याच्या वाढत्या हालचालींमुळे नागरिकांमध्ये तीव्र भीतीचे वातावरण निर्माण झाले आहे. विशेषतः आदिवासी निवासी शाळेजवळ बिबट्याचे दर्शन झाल्याच्या घटनांमुळे परिस्थिती अधिक गंभीर बनली असून, विद्यार्थ्यांच्या सुरक्षिततेचा प्रश्न ऐरणीवर आला आहे. या पार्श्वभूमीवर नागरिकांनी वनविभागाकडे तातडीने ठोस कारवाई करण्याची जोरदार मागणी केली आहे.

गेल्या काही दिवसांपासून रात्रीच्या वेळी शाळा परिसर, शेतमळे आणि झाडी भागात बिबट्याची वर्दळ वाढल्याचे दिसून येत आहे. काही नागरिकांनी प्रत्यक्ष बिबट्याला पाहिल्याचा दावा केला असून, त्यामुळे गावात दहशतीचे वातावरण पसरले आहे. नागरिकांनी रात्री घराबाहेर पडणे टाळले असून, शेतकरी व मजूर वर्गालाही कामासाठी बाहेर पडताना भीती वाटत आहे.

आता शब्द नको, थेट कारवाई हवी

स्थानिक नागरिकांनी संतप्त प्रतिक्रिया देत स्पष्ट शब्दांत मागणी केली आहे की,वनविभागाने लवकरात लवकर बिबट्याला जेरबंद करावे, अन्यथा मोठी दुर्घटना घडण्याची शक्यता नाकारता येणार नाही.प्रशासनाने केवळ पाहणी न करता प्रत्यक्ष पातळीवर उपाययोजना करणे आवश्यक असल्याचे मत व्यक्त होत आहे.

विद्यार्थ्यांच्या जीविताचा गंभीर प्रश्न

आदिवासी निवासी शाळा परिसरात विद्यार्थ्यांची मोठ्या प्रमाणात वर्दळ असते. अशा ठिकाणी बिबट्याची हालचाल सुरू असल्याने पालकांमध्ये प्रचंड चिंता निर्माण झाली आहे. सकाळ-सायंकाळ विद्यार्थ्यांची ये-जा सुरू असताना कोणताही अनर्थ होऊ नये, यासाठी तातडीने सुरक्षा व्यवस्था करण्याची मागणी होत आहे.

 

शेतकऱ्यांमध्येही भीतीचे वातावरण

बिबट्याच्या उपस्थितीमुळे शेतात काम करणाऱ्या शेतकऱ्यांनाही भीती वाटत आहे. काही ठिकाणी शेतकरी एकटे जाणे टाळत असून, गटाने जाण्याचा पर्याय स्वीकारत आहेत. जनावरांवर हल्ला होण्याची भीतीही व्यक्त केली जात आहे.

 उन्हाळ्यामुळे गावाकडे वळला बिबट्या?

दरम्यान, स्थानिक नागरिकांच्या मते, उन्हाळा सुरू झाल्यामुळे जंगलात पाण्याची व अन्नाची टंचाई निर्माण झाली आहे. त्यामुळे पाणी पिण्यासाठी व भक्ष्याच्या शोधात बिबट्या गावाच्या दिशेने येत असावा, असा अंदाज व्यक्त केला जात आहे. वनक्षेत्र कमी होणे आणि मानवी वस्तीचा विस्तार यामुळे अशा घटना वाढत असल्याचेही जाणकार सांगतात.

 नागरिकांचा इशारा

तात्काळ पिंजरे लावावेत

वनविभागाने रात्री गस्त वाढवावी

शाळा परिसरात विशेष सुरक्षा द्यावी

नागरिकांना सतर्कतेच्या सूचना द्याव्यात

या मागण्या तातडीने पूर्ण न झाल्यास नागरिक रस्त्यावर उतरून आंदोलन छेडतील, असा इशारा देण्यात आला आहे.महागांवातील ही परिस्थिती अत्यंत गंभीर असून, वेळेत कारवाई करणे अत्यावश्यक आहे. वन्यप्राण्यांच्या हालचालीकडे दुर्लक्ष करणे म्हणजे नागरिकांच्या जीवाशी खेळण्यासारखे आहे. आता एकच मागणी — बिबट्याला तात्काळ जेरबंद करा आणि महागावकरांना दिलासा द्या!